John A. Hostetler waar gebore de 29. Oktower in 1918 grad am End vum Erscht Grieg. Er waar gebore in en Schtettli, ass sie “Cold Water” g’heesse henn. Es iss grad negscht an Belleville in Mifflin County (PA). Sei Eldre waare Alt-Amisch.

Des waar glicklich, awwer die Zeit hot der glee John ‘s net gewisst. Er waar de fimft vun die Joe un Nancy Hostetler ihr Kinner, un iss in die Schul gange datt negscht deheem. ‘S waar en eeschtubbiches Schulhaus, bis sei Eldre nausgezogge sinn in Kalona (IA) in 1929.

Naach die Schul iss der John deheem gebliwwe uff die Bauerei un hot datt g’schafft mit sei Eldre, wie all die yunge Amische duhne noch heitzudaags, bis sie uff Elt sinn. Awwer in Blatz vun die amisch G’mee iss er zu die Mennischte-G’mee g’fahre mit sei Gaul, wu er grickt hot, wie er 17 Yaahr alt waar. Un in 1935 iss er noht in die G’mee datt gange bei die Mennischte. Er hot im Winter die Biewel-Schul b’sucht in Goshen (IN). Bei selle Zeit hot er g’wisst, ass er net Bauer sei will.

In 1942 iss er drunne an Hesston in en “Civilian Public Service Program” gange, weil er vum wehrlos Glaawe waar. Datt hot er g’schafft bis zum End vum Zwett Grieg. Naach’s Grieg iss er zerick in die Schul in Goshen, wu er sei B.A. grickt hot in 1949.

Weil er datt waar, hot er schun aag’fange g’hatt, iwwer die Vergangeheite un die Ideas vun die Amische zu schreiwe. Ball hot er aa g’schriwwe fer die “Mennonite Encyclopedia”.

Er un der Harold S. Bender vum “Encylclopedia Project” sinn guud minanner auskumme, un der Bender hot g’sehe dezu, ass der John in die Schul bleibt un in en Graduate-Schul geht.

Im neemlich Yaahr (in 1949) hot er die Hazel Schrock g’heiert, un sie sinn zu State College gezogge in Pennsilfaani, un datt hot er glei sei Graduate Student Studies in “Rural Sociology” an Penn State University aag’fange. In die Zeit hot er sei erscht Buch nausgewwe. Sell waar, was er “An Annotated Bibliography on the Amish” g’heesse hot.

‘S waar in 1951, wu er en schrecklich Unglick g’hatt hot. Sei Fraa, die Hazel, iss g’schtarewe bei die Geburt vun sei Kind. So hot er sei Fraa un sei Kind es neemlich Zeit verlore. Die annere henn ihn getreescht, un er hot sei M.A. Thesis faddich g’macht. Sei Thesis Title waar: “The Amish Family of Mifflin County”.

Noht hot er aag’fange fer sei Ph.D. gricke. ‘S neegscht Yaahr hot er en dinn Buch nausgeduh, ass er “Amish Life” g’heesse hot. Des waar ebbes, ass Verschtand gemacht hot. Sell waar en Bichli, ass en latt Tourists kaaft henn. Der John iss oft niwwerg’fahre iwwer die Barick an die Big Valley fer sei Schweschtre b’suche, die Sylvia un die Lizzy, ass datt gebliwwe waare. Sie sinn aa Amisch gebliwwe. So hot er immer en gude Idea g’hatt, was am aageh waar. Er hot in Touch bleiwe kenne mit die Amische. 1953 hot er die Beulah Stauffer g’heiert. Sie waar en Editor vun die Herold Press drauss in Scottsdale (PA). Fer die neegschte 48 Yaahr henn die zwee Leit minanner g’schafft. Sie waar sei Critic, sei Kumraad, ‘s ganz Lewes lang. John’s Dissertation, “The Sociology of Mennonite Evangelism”, waar gedruckt in 1954.

Der John Hostetler waar noht en Professor in Sociology un Anthropology, die meenscht Zeit in Temple University in Philadelphia (PA). Er iss g’schtarewe am 28. Augscht 2001.

Gwelle Ennere