Der Benjamin Weaver waar en Bischof in Pennsilfaani in der Mennischde Gmee. Er waar em Isaac Weaver (1825-1891) sei Sohn (Mast unn Simpson, 1942: 659). Sei Mudder waar die Catharine ("Maemmi" Weaver) Witmer. Der Benjamin hot sei Schuling geduh in der Smoketown Schuhl in Caernarvon Taunschip in Lengeschder Kaundi (Mast unn Simpson: 659). Sei Fraa waar die Barbara Sauder (Mast unn Simpson: 663). Er hot en Seider Press ghatt unn waar en Miller unn hot die Upper Windsor Gristmiehl gschpraengt bis er en Bischof warre iss. Nooch sellem, ass er en Bischof warre iss, hot er noch Fens unn Bumpe verkaaft (Mast unn Simpson: 661). Der Benjamin Weaver unn die Barbara Sauder henn nein Kinner ghatt. Sie waare der Samuel Weaver, der William Weaver, der Benjamin Weaver, Jr., es Katie Weaver, der Jacob Weaver, es Emma Weaver, der Isaac Weaver, unn es Hannah unn es Elizabeth wu sinn yung gschtaerewe (Mast unn Simpson: 663). Er iss gegraawe in em Weaverland Graabhof in East Earl Taunschip, Lengeschder Kaundi. Er waar der sext Weaverland District Bischof.