Die Weschfraa
Am Weschdaag schunn im Allerfrieh
Draagt sie Hols un Feier hie—
Kessel, Eemer, Ziwwer—alles muss herbei—
Iss des doch net en groossi, schweri Rischderei?
Es Feier brennt, un leicht so schee,
Un's Wasser zischt schunn in die Heeh!
Dann kummt die Wesch—en Bindel voll—
Ya, hinnenoh un nochemol,
Leine, wolle, glee un grooss, un all verschmutzt;
Kee Wunner, ass die Weschfraa schteht un guckt un schtutzt!
Es Wasser kocht schunn in die Heeh,
Nau kann sie flink ans Wesche geh!
Doch net zu waarm un net zu kalt,
Giesst sie ei, un macht dann halt—
Haddi Seef un weechi Seef muss aa noch bei;
Scharfe Sache gheere zu der Rischderei!
Sie bickt sich in der Zuwwer nei,
Un legt die leine Wesch sich ei.
Guck, wie sie iwwer'm Weschbord hengt—
Alle Grefde sich aaschtrengt—
Uff un nidder reibt sie ewich lang druffnei;
Ich meecht net ihr Hend un ihr Buckel sie!
Nau schwenkt sie's mol un dreht sich's aus—
"Ee Schtick iss doch mol widder haus!"
"Du aarmi Weschfraa, ich muss fatt,
Ich weess, du hoscht's erbaermlich haat;
Growwe, hadde Mensche denke gaar net draa,
Drumm gewwe sie dir aa en gleener Kummerloh!"
Ich guck noch zrick un denk debei,
"Ich meecht doch net en Weschfraa sei!"