Em Schteddelmann sei Wunsch
Ich wott, ass ich en Bauer waer,
Un hett en Bauerei;
Hett griene Geil un geele Kieh,
Un groosse, schwatze Sei.
Ich wott, ich hett en Bauerei
An Tulpehocke Grick,
Dann deet ich Keffer schiesse geh
Im Siessgrummbiere Schtick.
Die Rauwe uff de Weezebeem,
Der haarich Hinkelfloh,
Der Grautwarm an de Hickerniss,
Die Leis am Paschingschtroh,
Des Schtofft misst all ans Draewle geh,
Wann ich en Bauer waer.
Mit Paris Green un Pulwerbix,
Do gingt ich iwwer sie her!
Ich fang en nei-i Faeschen aa,
Im Winder mach ich's Hoi.
Wann's heess iss, bleib ich aus der Sunn
Un fress die Kascheboi.
Ich grick mir'n weissi Schmierkeeskuh
En Hof voll Ginnigens,
En mechdicher Rotriewebaam
Un patentledder Fens.
Die Hinkel halt ich in der kich,
Der Seischtall vor der Dier;
Grick Rock un Hosse vun Kaduu,
Un Kallers vun Babier.
En brinselbrauner Muulibull
Muss in der Scheierhof,
Alpaca Hinkel, Baarzatt Hund,
Un Kochin Schaenghei Schoof.
Ich bau uff meinre Bauerei
En rodes Schweitzerhaus;
Ich mach mei ganser Gaarde rum
Un seeh'n mit Wallniss naus.
O, wann ich doch en Bauer waer,
Un hett en Bauerei,
Un hett en groossi, dicki Fraa
Dann wett ich Bauer sei.
Ich kaaf mir'n groossi Bauerei
Datt drunne an der Schtadt,
Un such mir'n groossi, deitschi Fraa
Die hot aa viel verschtand.
Sie binnt kee Blech in ihre Haar
Un kummt net so grooss raus,
Un wann sie aa en bissel dutt,
Dann macht's yo gaar nix aus.