Die Florence Baver (1911-1999) waar gebore uff’re Bauerei bei Lenhartsville, Baricks Kaundi, PA. Wie annre deitschie Leit in sellie Zeit hot sie kenn English g’lannt odder g’schwetzt deheem. Sie hot English erscht aagenumme, wie sie in die Ee-Schtubb-Schulhaus gange iss fer acht Yaahr.

Vun datt iss sie in die Kutztown Normal School (heitesdaags Kutztown University) un hot Schul g’halde draus uff’em Land fer die Bauersleit in Greenwich Township, Baricks Kaundi.

Wie sie der Russel Baver g’heiert hot (er waar aa en Schulmeeschder), sinn sie naach der Schtettel Easton, PA, gezogge un alle beed henn Schul in Easton g’halde.

Sie henn “genealogy” uffgenumme, un noh Pennsylvaanisch Deitsch “history” un “folklife” dazu g’sammelt un uffg’schriwwe. In en paar Yaahrs Zeit henn sie viele Bicher un Karichebabiere selwert g’sammelt un henn der Pennsylvaanisch Deitsch Folk Kultur Museum in Lenhartsville uffg’schtart. Die Florence Baver hot alle Woch en Zeidingschtick g’schriwwe in die Mudderschprooch, ass “Es Bobbelmaul Schreibt” (June 4, 1953 - January 14, 1960) g’heesse hot, un schpeeder hot sie en Pennsylvaanisch Deitsch “Radio Show” aag’halde. Die Florence Baver iss g'schtarewe der neint Yenner 1999. All ihr Babiere un Bicher hot sie zum Northampton Historical Society, Easton (PA) gewwe, so ass es datt versarrigt watt.