Sponge Kuche

Do paar Munet zerick hot der George Laahr gheiert. En Meedel, as er gheiert hot, wie so viel vun de Schteddlermeed heidichdaags, hot gaar net gewisst, wie zu koche. Sie hot in ihrem ganze Lewe noch ken Kuche gebacke ghadde. Well, der anner Owet, wie der George heemkumme is vun der Arewet, hot sei Fraa gsaat: "Ich hab en Surpreis fer dich den Owet, George," un noh hot sie ebbes reigebrocht uff en Deller. "Was is dann sell?", froogt der George. - "Ei, sell is en Sponge Kuche," saagt sei Fraa, "awwer ich weess net, ferwas er so gschpassich guckt. Es wunnert mich yuscht, eb seller Schtorkipper mir die letze Satt "Sponges" gschickt hot." - Ya, so geht's.

(Verzehlt vum Albert F. Buffington, 1962)